काभ्रे (धुलिखेल) – कोरोना भाइरस विरुद्धको दोस्रो चरणको खोप कार्यक्रम अन्र्तगत काभ्रेमा आज १ सय ९ जनाले लगाएका छन् । धुलिखेल अस्पताल र मेथिनकोट अस्पतालमा गरी आज १ सय ९ जनाले खोप लगाएको जिल्ला स्वास्थ्य कार्यालय काभ्रेले जनाएको छ ।

दोस्रो चरणको खोपमा पहिलो चरणमा छुट भएका स्वास्थ्य मातहतका व्यक्तिहरु, स्थानीय पालिकाका जनप्रतिनिधि तथा अन्य कर्मचारी, निजामति सेवाका कर्मचारी, जनपथ प्रहरी र खोप केन्द्रमा खटिएका ससस्त्र प्रहरी रहेका छन् । त्यसैगरी बैंक तथा तथा वितिय संस्थाका कर्मचारी, प्राधिकरण र संस्थामा कार्यरत कर्मचारी, न्याय सेवा समुहका कर्मचारी, पत्रकार, एम्बुलेन्स तथा शव वाहन चालक तथा सहचालकहरु र शव व्ययवस्थापनमा प्रत्यक्ष खटिने व्यक्तिहरु रहेका छन् ।

कोरोना खोपका लागि अनुमित पाएको जिल्लाको धुलिखेल अस्पताल र मेथिनकोट अस्पालमा कोरोना विरुद्धको खोपको दोस्रो चरणको कार्यक्रम सञ्चालन भइरहेको छ । यस अघि जिल्लामा पहिलो चरणको कोरोना विरुद्धको खोप कार्यक्रममा ३४ सय ९४ जनाले खोप लगाइसकेको कार्यालयको जानकारी छ ।

त्यस्तै काभ्रेमा आज एक जनामा कोरोना संक्रमण पुष्टि भएको छ । संक्रमित व्यक्ति बनेपा नगरपालिकाका रहेका छन् । योसँगै जिल्लामा कुल संक्रमित संख्या ३३ सय ४८ पुगेको छ । काभ्रेमा अहिले ५ जना मात्र सक्रिय कोरोना संक्रमित रहेको जिल्ला स्वास्थ्य कार्यालय काभ्रेका प्रमुख डा.नरेन्द्र कुमार झाले बताए । उनका अनुसार सक्रिय संक्रमितमध्ये बनेपा नगरपालिकाबाट १ जना महिला र १ जना पुरुष , धुलिखेल नगरपालिकाबाट १ जना महिला र पनौती नगरपालिकाबाट २ जना महिला गरी काभ्रेमा अहिले ५ जना सक्रिय संक्रमित रहेका छन् । त्यस्तै जिल्लामा आज एक जनाको उपचारपछि संक्रमणमुक्त भएको कार्यालयको जानकारी छ । अहिलेसम्म जिल्लामा कोरोना संक्रमणका  कारण ४५ जनाको मृत्यु भएको छ ।


तपाईको प्रतिक्रिया