काभ्रे (चौंरीदेउराली) – जिल्लाको चौंरीदेउराली गाउँपालिकाले तामाङ समुदायको साँस्कृतिक पर्व तथा नयाँ वर्ष २८५७ लाङ (म्हे) सोनाम ल्होछारको अवसरमा ३ दिन सार्वजनिक विदा दिने निर्णय गरेको छ । ल्होछारमा सार्वजनिक विदा दिने निर्णय शुक्रबार सम्पनन गाउँसभाले गरेको हो ।

सार्वजनिक विदा माघ २९, ३० र फाल्गुण १ गते दिने निर्णय गरेको गाउँपालिकाका प्रवक्ता तथा ३ नं. वडा अध्यक्ष विनोद घिसिङले जानकारी दिए । तामाङ समुदायको बहुल्यता रहेको यस गाउँपालिकामा यो वर्षदेखि ३ दिन सार्वजनिक विदा दिने निर्णय गरेको हो ।

तामाङ समदायको महान पर्वको रुपमा रहेको सोनाम ल्होछारको प्रवद्र्धन र विकास गर्नु सरकारको दायित्व भएकोले सोनाम ल्होछारमा ३ दिन सार्वजनिक विदा दिएको गाउँपालिका अध्यक्ष दिननाथ गौतमले जानकारी दिए । ‘नेपाल बहुजातिय, बहुसाँस्कृतिक, बहुधार्मिमक मुलुक हो । सबै समुदायको भाषा, धर्म, संस्कृतिको रक्षा, विकास र सम्बद्र्धन गर्नु सरकारको दायित्व हो ,’ अध्यक्ष गौतमले भने, ‘त्यसैले यो पटकदेखि हाम्रो गाउँबासी जनताको भावनाको सम्मान गर्दै आफ्नो साँस्कृतिक पर्व धुमधामका साथ मनाउने वातावरण बनोस भनेर ल्होछारमा ३ दिन सार्वजनिक विदा दिने हामीले निर्णय गरेका हौं ।’

अध्यक्ष गौतमले हिन्दु धर्मोलम्बीहरुको पर्व दशैं र तिहारालाई जति नै अरु समुदायको चाडपर्व र संस्कारलाई पनि उत्तिकै सम्मान र समान व्यवहार गर्दै अघि बढ्ने बताए । सोही अनुसार यो वर्षमा गाउँपालिकाले गाउँपालिका स्तरीय ल्होछार साँस्कृतिक कार्यक्रमको समेत आयोजना गरेको छ । गाउँपालिकाले सो कार्यक्रमको लागि बजेटको समेत व्यवस्था गरेको प्रवक्ता घिसिङले जानकारी दिए । घिसिङका अनुसार साँस्कृतिक कार्यक्रम वडा नं. ७ को मादनकुँडारीमा आयोजना गरिएको छ ।

 


तपाईको प्रतिक्रिया