काठमाडौं । पत्याउन गाह्रो पर्ने ठगीको नयाँ घटना सार्वजनिक भएको छ । घटना अनुसार श्रीमान् नक्कली वकिल र श्रीमती नक्कली डीएसपी बनेर सर्वसाधारण ठगेको घटना बाहिर आएको हो ।

महानगरीय प्रहरी परिसर काठमाडौँले श्रीमान् नक्कली वकिल र श्रीमती नक्कली डिएसपी बनेर ठगीको संगठित धन्दा चलाउने एक जोडीलाई पक्राउ गरेको छ ।पीडितहरुको उजुरीको आधारमा पक्राउ परेका जोडीले करोडौँ ठगेको देखिएको छ । ठगीकै माध्यमबाट उनीहरुले करोडौँ रुपैँयाँ जम्मा गरेको बताइन्छ ।

काठमाडौंको बालाजुमा घर भएका मनोहर तिवारी र सीता उप्रेतीले वर्षौअघिदेखि ठगी धन्दा चलाउँदै आएका थिए । सुरुमा श्रीमान मनोहर तिवारीलाई पक्राउ गरेको प्रहरीले पीडितको उजुरीको आधारमा प्रहरी हवल्दार सीता उप्रेतीलाई समेत पक्राउ गरेको महानगरीय प्रहरीले जनाएको छ ।

प्रहरीले  तिवारी र उप्रेती दुबैलाई ठगी र संगठित अपराधको मुद्दमा अनुसन्धान गरिरहेको बताएकोछ । प्रहरी स्रोतका अनुशार ‘सुरुमा हामीले पीडितहरुको झण्डै दर्जन उजुरीको आधारमा मनोहर तिवारीलाई पक्राउ गरेका थियौँँ, अनुसन्धान र थप उजुरीका कारण तिवारीकी श्रीमती त्रिभुवन विमानस्थालका कार्यरत प्रहरी हवल्दार सीता उप्रेतीलाई यही भाद्र ३ गते पक्राउ गरिएको छ ।’

प्रहरीका अनुसार सीता हवल्दारबाट नलिम्बित भएकी छिन । उनीहरु माथि सम्पत्ति शुद्धिकरणको मुद्दा समेत चल्न सक्ने प्रहरीले जनाएको छ । प्रहरीमा परेको उजुरीका अनुसार उनीहरुले ठगीबाटमात्रै पाँच करोड बढी सम्पत्ति जम्मा गरेका छन ।

प्रहरीको अनुसन्धानबाट खुले अनुसार तिवारी न कानुन व्यवसायी (वकिल) हुन नत लेखापढी व्यवसयी नै तर उनले कुर्सीको पछिपट्टी कालोकोट राखेर घरमै अफिस खोलेर वकिल हुँ भन्दै विचौलियाको भूमिकामा ठग्दै आएका थिए ।

एक दशकअघिदेखि वकिलका नाममा ठग्दै आएका तिवारीले पछिल्लो पटक आफ्नो ठगी धन्दालाई राजनीतिक रंग समेत दिएका थिए । तिवारीबाट पीडित भएका एक व्यक्तिका अनुसार उनले विगतमा नेकपा एमालेको कार्यकर्ता हुँ भन्दै राजनीतिक सम्बन्ध देखाएर ठगी गर्दथे तर पछिल्लो एक वर्षयता आफू स्वतन्त्र भन्ने र कांग्रेसका नेताहरुसँग सम्बन्ध रहेको बताउँदै आएका थिए ।

उनी सधैँजसो कालोकोटमा सजिएर छातीको दायाँतर्फ नेपाल बार एसोसिएसनको लोगोसमेत लगाएर अदालत र शहर चहार्दै हिँड्डुल गर्ने गर्दथे ।  अदालतको इतिहासमै पहिलोपटक जिल्ला अदालत ललितपुरले तिवारीलाई विचौलिया घोषित गरी अदालत प्रवेश रोक लगाएको सार्वजनिक सूचना समेत प्रकाशित गरेको थियो ।

नक्कली वकिल मनोहर तिवारी, जो लेखनदास समेत नरहेको प्रहरी अनुसन्धानबाट खुलेको छ । कानुन व्यावसायी भनेर मुद्दाका पक्षहरूको साथमा विभिन्न इजलास, मुद्दा शाखा र अभिलेख शाखामा जाने तिवारीले अदालती काम कारवाहीमा समेत अवरोध हुनेगरी बिचौलियाको भूमिका निर्वाह गरेको भन्दै ललितपुर जिल्ला अदालतले २०७२ चैत २३ गते अदालत प्रवेशमा निषेध गर्ने निर्णय नै गरेको हो ।

तिवारीको मुख्य काम भनेको अदालत परिसरमा भेटिने सेवाग्राहीलाई मुर्गा बनाउने र आफ्नो कार्यालयसम्म लगेर ठग्ने रहेको बुझिएको छ । प्रहरीको हवल्दार रहेकी श्रीमतीलाई उनले डिएसपी भएको बताउने गरेको पीडितहरुले बताउने गरेका छन् ।  उनले घरमा आउने मान्छेलाई आफू डिएसपी रहेको बताउने गरेकी थिइन । र निहुँ खोजे समातारे थुनिदिने धम्की दिने गरेकी थिइन ।

तिवारीले मुद्दा जिताइदिन्छु भनेर पैसा लिएका थिए । केहीले कागे परे मुद्दा जिते पनि अधिकांश बढीले मुद्दा हारेपछि आफ्नो पैसा फिर्ता माग्ने गरेका थिए । तर पैसा माग्ने मान्छे आएपछि श्रीमतीलाई डिएसपीको बर्दी लगाउन लगाएर तीनलाई धम्काउने काम गर्ने गरेको प्रहरी अनुसन्धानबाट खुलेको छ ।

प्रहरीमा परेको उजुरीका अनुसार काठमाडौं महानगरपालिका वडा नम्बर २६ मा केही व्यावसायीहरू मिलेर ‘सामूहिक व्यावसायिक बचत तथा ऋण सहकारी संस्था’ खोलेका थिए । ‘ज्योती समूह, सुधिर बस्नेत तथा लालिगुराँस सहकारीको कानुनी सल्लाहकार हुँ’, भन्दै उक्त सहकारीको सम्पर्कमा पुगेका तिवारीले ५ करोड लगानी गरेर ‘सामूहिक व्यावसायिक बचत तथा ऋण सहकारी संस्था’लाई वाणिज्य बैङ्क बनाउने योजना सुनाए ।

सहकारी सञ्चालकहरूले तिवारीको कुरा पत्याए अनि ५ करोड बराबरको सेयर दिन राजी भए । मौखिक रूपमा सहकारीका सञ्चालकहरू सेयर दिन सहमत भएसँगै मनोहरले उक्त सहकारीको कार्यालयमा आफ्नै हालीमुहाली चलाए र सहकारीमा एक रुपैयाँ पनि लगानी नगरी त्यहीबाट एक करोड बढी ठगी गरे ।

ललितपुर जिल्ला अदालतले नक्कली वकिल मनोहर तिवारीलाई अदालतमा प्रवेश निषेध गरेको सूचना उनले डिएसपी बनाएकी श्रीमती तीन नम्बरकी हुन । जो मनोहरको सम्पर्कमा आएर श्रीमान छोड्ने समयसम्म पनि ठगीकै काममा थिइन् ।

एक छोरासहित मनोहरसँग दोस्रो बिहे गरेकी सीताको घरमा समेत एकाधिकार चलाएकी छिमेकीहरुले बताएका छन्  । टोल छरछिमेकमा उनीहरुको दादागिरी चरमचुलीमा पुगेको थियो । दुबै जना प्रहरी हिरासतमा पुगेपछि छिमेकीहरु भने खुशी देखिएका छन ।


तपाईको प्रतिक्रिया