तिमीलाई हेर्दा

मेरो मनमा खुसीको सीमा रहन्न

बलजस्तै तिमी गुड्छौ

दौडिन्छौ

अथवा  नाँच्छौ ,

बलसँगको तिम्रो त्यो कला

प्रिय लाग्छ मलाई

हेरेर कहिल्यै नअघाउँने

नथाक्ने बनायौं

मेरा आखाहरू

मेरो मनलाई ।

 

‘फिल्ड’ मा तिमी दौडिँदा

हजारौं मनहरुसँग

मेरो मन पनि दौडिन्छ,

जब तिमी दौडिदै

बलको कुची (ब्रस) ले

अद्भुत चित्र बनाउँछौ मैदानमा

म हेरिरहन्छु तिम्रो ब्रस चलाउँने

देब्रे खुट्टा

हरियो चउरमा कोरिएका सुन्दर चित्रहरु

म सजाईरहेछु मेरो मनको क्यानभासमा

तिम्रा लाखौ अरु “फ्यान” हरुसँगै !

 

तिमी खेल्दा

बल खेलाउँने तिम्रो खुट्टाको जादुमा

मेरो खुट्टा पनि थपिन्छ

हेर्दा तिमीले खेलीरहेको

म भुल्छु

तिमी नै थियौ त्यो जादुगर भनेर,

म बल नै नछोएको मान्छेलाई

“ फुटबलर” बनायौ तिमीले ।

 

तिमीसंगै थुप्रै “लीग” हरु जीतें

तक्माहरु, कपहरु थुपारें

खुशी मनाएँ,

भोगें तिमीसंगै नचिताएका

आकस्मिक हारहरुको पीडा  पनि,

छट्पटाएँ, रोएँ

र  तिमीलाई हेरेर हौसला थपें आफूमा ,

हारेर पनि जीत्न सक्ने रहेछौ तिमी

सपना देख्न सिकायौ तिमीले ।

 

“गोल” तिमी गर्छौ

खुशी म मनाउँछु,

तिम्रो “पासमा”

म बल भेट्न दौडिन्छु,

तिमी लड्दा

म पछारिन्छु

खेलमा

तिमीबाट म अलग छैन ।

 

हावाजस्तै बेगवान

जव “बल” संग तिमी दौडिन्छौ

स्वर्गकी नृत्यांगनाका चालहरु झै

तिम्रा खुट्टाहरु

“बल” संग नाच्न थाल्छन् ,

“डिफेन्डरहरु” एक एक गरेर

ढल्छन् युध्द मैदानका

पराजीत सिपाहीहरु जस्तै ।

 

वाज झै “गोलपोष्ट” मा

जव तिमी हेर्छौ

निसहाय “किपर” संगै

सबै हेर्छन् तिमीतिर

माँत्र तिमीतिर

मेरो “हिरो”

मेरो महान “फुटबलर मेस्सी” ।


तपाईको प्रतिक्रिया